Rješenja za četiri dječije ružne navike

Za početak treba otkriti šta djecu navodi da rade ono što zabrinjava i nervira roditelje

Piše: Radenka Marković/Blic žena

Većina djece mlađe od šest godina ima neku ružnu naviku poput sisanja palca, grickanja noktiju i čupkanja kose, što je, objašnjava Žana Erdeljan, psiholog Predškolske ustanove „Radosno detinjstvo“ u Novom Sadu, sasvim normalna pojava.

– Mališani nisu ni svjesni svojih ružnih navika, pa ne mogu ni da ih se oslobode bez pomoći odraslih, prvenstveno roditelja. Za početak treba otkriti šta djecu navodi da rade ono što zabrinjava i nervira roditelje – objašnjava Žana Erdeljan.

Sisanje palca

Zahvaljujući ultrazvučnim snimcima, pouzdano se zna da bebe sisaju palac još u majčinom stomaku. Ovu naviku većina njih zadržava do šestog mjeseca jer ih na nju navodi nagon za sisanjem, ali ima djece koja ne uspjevaju da prevaziđu ovu fazu. Ona do druge godine sisaju palac kad su gladna, uplašena i umorna i kada im je dosadno, ali ako se ova loša navika ne izgubi do četvrtog rođendana, treba potražiti stručnu pomoć. Najvažnije je utvrditi da li dijete to radi zato što je nesigurno, uznemireno ili uplašeno.

– Problem je često posljedica grešaka u vaspitanju i pogrešnog pristupa mališanima. Prezaštićeno dijete nad kojim roditelji neprekidno bdiju i ne dozvoljavaju mu da išta učini samo zaključuju da je „dobro biti beba“ – objašnjava naša sagovornica i naglašava da opomene, prijetnje, kazne i ponižavanje ne pomažu, naročito ako roditelji to rade pred nekim.

Naročito je kontraproduktivno mazanje prsta ljutom paprikom, gorkim, slanim i kiselim namirnicama i preparatima koji dijete treba da odviknu od sisanja palca. Znatno je korisnije da se utvrdi zašto dijete to radi i da mu se, u skladu s uzrokom, pomogne.
– Ako dijete sisa palac zato što mu je dosadno, uposlite mu ručice, bilo igrom bilo nekim poslićem, a ako to radi zato što je nesigurno, pružite mu veću emocionalnu podršku.

Čupkanje kose

Čupkanje kose djeci služi za smanjivanje napetosti. Djeca se na ovaj način nesvjesno „vraćaju“ u period kada su bila mala i kada su, ležeći u majčinom krilu, uvijali njenu kosu. Čupkanju i sisanju krajeva kose sklonije su djevojčice. Ukoliko se ova navika javi prije šeste godine, veća je vjerovatnoća da će se spontano izgubiti. Međutim, čupkanje kose prvi put može da se pojavi i znatno kasnije, nekada i u doba adolescencije. Nekada čupkanje kose nastupa poslije događaja koji su za dijete stresni i može da iskazuje neslaganje s najbližom okolinom, često i roditeljima. Ako je čupkanje samo dio rituala, recimo pred spavanje, ne bi trebalo paničiti, ali ako se često dešava i dijete gubi dosta kose, treba potražiti pomoć stručnjaka.

Grickanje noktiju

Grickanje noktiju jedna je od najčešćih dječjih ružnih navika. U ranom djetinjstvu podjednako je prisutna i kod dječaka i kod djevojčica, ali se u kasnijem uzrastu češće sreće među dječacima. Djeca najčešće grickaju nokte kada su uznemirena, uzbuđena, uplašena, a ponekad to rade i iz dosade.
– Pokušajte da utvrdite u kojim situacijama dijete grize nokte, u čijem prisustvu to radi, šta ih nagoni na to. Kada otkrijete okidač, skrenite mu pažnju na svoje zaključke. Na primjer, recite mu: „Primjetila sam da grickaš nokte kada si uzbuđen i kada gledaš crtiće“, pa će tako vaš mališan nepoželjnu radnju lakše povezati sa stanjem koje joj prethodi. Kada primjetite da gricka nokte, priđite mu i nježno mu sklonite ruku s usta. Sjedite pored njega i zagrlite ga. Ne opominjite ga, neće vrijediti – objašnjava naša sagovornica.
Zbog grickanja noktića dijete ne treba kažnjavati, niti se zgražavati nad njegovim rukama. Bolje mu recite da pusti noktiće da se odmore, zaposlite mu ruke, razgovarajte s njim i pohvalite ga kada vidite da se trudi da prestane.

Neprijatni tikovi

Tikovi su iznenadni, brzi, ponavljajući, nesvrsishodni i, u velikoj mjeri, nevoljni pokreti mišića ili dijelova tijela. Izaziva ih snažna emocionalna napetost, nasljedni i organski faktori. Najčešće se pojavljuju na licu, u vidu treptanja, žmirkanja, pućenja usana, pravljenja grimasa i plaženja jezika, ali postoje i glasovni tikovi kao što su pročišćavanje grla i šmrkanje. Najčešći su kod djece između sedme i jedanaeste godine, mahom kod dječaka.
– U najvećem broju slučajeva okidač je stres, pa je najvažnije otkriti uzrok. To može da bude preopterećenost obavezama, polazak u vrtić ili školu, selidba, rođenje brata ili sestre, razvod… I u ovom slučaju kritike i kazne ne pomažu, pa bi valjalo da utvrdite šta je izazvalo tikove. Tako ćete moći da eliminišete ili izbjegavate stresne situacije ili pak da skrenete djetetu pažnju na nešto drugo. I sport može da pomogne. Međutim, ukoliko se tikovi ne povuku za nekoliko mjeseci, ako se šire na druge dijelove tela ili su učestali, konsultujte se s ljekarom – poručuje Žana Erdeljan.

Akos.ba